Türkmenistanyň zenanlar ýygyndysy Aziýa kenar ýaka oýunlarynda çykyş eder
16
Türkmenistanyň zenanlar milli ýygyndysy kenar ýaka gandboly boýunça Hytaý Halk Respublikasynyň Haýnan adasynyň Sanýa şäherinde geçiriljek 6-njy Aziýa kenar ýaka oýunlaryna gatnaşar. Bu abraýly sport çäresi 22–30-njy aprel aralygynda geçiriler.
Türkmenistanyň ýygyndysy zenanlaryň arasynda geçiriljek kenar ýaka gandboly ýaryşynda çykyş eder. Guramaçylaryň mälim etmegine görä, ýaryşa Aziýanyň 9 ýurdunyň ýygyndylary gatnaşýar. Olar Hytaý, Hindistan, Türkmenistan, Wýetnam, Gonkong-Hytaý, Mongoliýa, Filippinler, Tailand we Şri-Lankadyr. Toparlar iki topara bölünip, ýaryş toparlaýyn ulgamda geçiriler.
Türkmenistanyň milli ýygyndysyna tälimçiler Gülendam Narbaýewa we Marina Diwanowa ýolbaşçylyk edýärler.
6-njy Aziýa kenar ýaka oýunlarynda sportuň 14 görnüşi boýunça 63 toplum medal ugrunda bäsleşik geçiriler. Bu iri sport çäresi Aziýa ýurtlarynyň iň güýçli türgenlerini bir ýere jemläp, dostluk we sport hyzmatdaşlygyny pugtalandyrmaga hyzmat eder.